sulfonamideve në produktet me origjinë shtazore të destinuara për konsum njerëzor

strehim të kufizuar, në kontrast kjo me sistemin tradicional të administrimit pa kufi, që do

të thotë që kafshët lejoheshin të bridhnin rreth hapësirave të gjera të fermave në kërkim të

ushqimit. Sigurisht kjo ka sjell rritjen në mënyrë të pashmangshme të shfaqjes dhe

përhapjes së sëmundjeve infektive dhe për pasojë përdorimin më të madh terapeutik dhe

profilaktik të antimikrobialeve. Administrimi i antimikrobialeve mund të rezultojë me

prezencë të mbetjeve të këtyre substancave ose të metabolitëve të tyre në ushqime me

origjinë shtazore si mish, qumësht, vezë etj. Për të mbrojtur shëndetin e konsumatorit, një

nga parimet më të rëndësishme të përcaktuara në legjislacionin e BE-së për autorizim të

marketingut të barnave veterinare, është që produktet me origjinë nga kafshët e trajtuara

me medikamente veterinare nuk duhet të përmbajë mbetje që mund të përbëjnë rrezik për

shëndetin e konsumatorit. Ndikimi i këtyre mbetjeve në shëndetin e konsumatorëve, si

p.sh. alergjitë dhe rezistenca e mikroorganizmave ndaj antibiotikëve, etj., ka çuar në

legjislacion dhe masa shumë të rrepta për kompanitë që nuk i zbatojnë.

Sulfonamidet si një nga klasat e medikamenteve antimikrobiale përdoren më shumë në

fermat e gjedhit, derrit dhe të shpendëve. Ato absorbohen lehtësisht dhe shpërndahen në

trupin e kafshëve, duke u akumuluar në inde të ndryshme dhe duke u transferuar në

produktet e tyre. Nëse nuk zbatohen periudhat e eliminimit të medikamentit përpara se të

merret produkti ushqimor nga ato, atëherë produktet e dala nga këto kafshë mund të jenë

të ndotura me sulfonamide. Mbetjet e sulfonamideve dhe të metabolitëve të tyre

gjenerojnë probleme mjaft serioze në shëndetin njerëzor të tillë si reaksione alergjike,

rezistencën e mikroorganizmave (Salem 1998, Kozarova dhe Mate 2001), ndërsa disa

sulfonamide kanë dalë mjaft kancerogjene (Nue 1992). Këto fakte kanë shkaktuar debate

të gjera në lidhje me sigurinë ushqimore të produkteve me origjinë shtazore. Me qëllim

për të mbrojtur konsumatorin, Bashkimi Europian ka vendosur Limitet Maksimale të

Lejuara (MRL-të) për mbetjet e medikamenteve veterinare në produktet me origjinë

shtazore, të bazuara në vlerësimin shkencor të sigurisë së këtyre substancave. Sipas

rregullores së Komisionit (EU) Nr 37/2010 Niveli Maksimal i Mbetjes (MRL) i

sulfonamideve në produktet me origjinë shtazore është përcaktuar 100 μg kg-1 dhe sipas

protokollit të përdorimit të medikamentit periudha e eliminimit të sulfonamideve është 15

ditë.

Shtetet anëtare të Bashkimit Europian në zbatim të Direktivës së Këshillit 96/23/EC dhe

Vendimit të Komisionit 2002/657/EC janë të detyruar të paraqesin planet kombëtare

vjetore të kontrollit të mbetjeve për miratim nga ana e Komisionit Europian, plan i cili

përmbledh harmonizimin e monitorimit të substancave të caktuara dhe mbetjeve të tyre

në produktet me origjinë shtazore, duke treguar për secilin produkt (mish, qumësht, vezë,

etj) grupet e substancave që duhen të monitorohen, përcaktimin e niveleve dhe

frekuencën e kampionimit, rregullat e hollësishme për marrjen e mostrave zyrtare dhe

vendosjen e kritereve të performancës, si dhe kërkesa të tjera për metodat analitike dhe

interpretimin e rezultateve.