English

Mirësevini në faqet e Fakultetit të Shkencave Natyrore (FShN), Universiteti i Tiranës. FShN është qendra kryesore në Shqipëri për përgatitjen e specialistëve të lartë në matematikë, fizikë, kimi, biologji dhe informatikë; ai është nga institucionet më të rëndësishme për përgatitjen e mësuesve për shkollat e mesme në këto disiplina.

FShN përbëhet nga departamentet e Biologjisë (3 Seksione), Fizikës (4), Informatikës (1), Matematikës (5), Kimisë së Përgjithshme (4) dhe Kimisë Industriale (2). Pranë kryejnë aktivitetin e tyre edhe dy qendra studimore: Kopshti Botanik i Tiranës (KB) dhe Muzeu i Shkencave Natyrore (MShN), si dhe tri Qendra Kualifikimi të Mësuesve: për matematikë, për fizikë, dhe për biologji dhe kimi. Fakulteti ka një staf akademik të brendshëm prej mbi 125 punonjësish, prej të cilëve mbi rreth 70 profesorë ose profesorë shoqërues. Ai drejtohet nga Dekani, i zgjedhur nga Këshilli i Fakultetit, i cili zgjidhet nga bashkësia e punonjësve akademikë dhe e studentëve.

Në FShN studiojnë çdo vit mbi 2.600 studentë, rreth 2.250 prej të cilëve në kohë normale. Gjithsej ofrohen mbi 10 diploma universitare:  2 në matematikë, 2 në fizikë, 2 në biologji, 3 në kimi, 1 në informatikë. Gjithashtu, në mjediset e FShN-së kryejnë laboratorët dhe seminaret, shpesh edhe leksionet në lëndët e Biologjisë së Përgjithshme, Kimisë, Fizikës dhe Botanikës, gjithë studentët e degëve Mjekësi, Farmaci dhe Stomatologji, të Fakultetit të Mjekësisë, UT.

Në faqet në vijim ju do të gjeni një informacion  të hollësishëm për FShN.  Shpresojmë që informacioni të jetë i vlefshëm, duke mbetur të hapur ndaj çdo vërejtje ose këshille për përmirësimin e mëtejshëm.