Ai është institucion i vetëm në Shqipëri, me karakter kërkimor, kulturor dhe edukues. Aktiviteti shkencor është përqendruar kryesisht në studimin e florës dhe bimësisë së Shqipërisë, veçanërisht llojeve të kërcënuara, të rralla dhe endemike, dhe rritjen e tyre brenda Kopshtit. Këtu gjen strehë rreth 1400 lloje dhe nënlloje bimore, gati një e treta e florës së Shqipërisë. Aktivitete të tjera kanë të bëjnë me studimin e bio-ekologjisë së llojeve të introduktuara, me studimet fitosociologjike të livadheve natyrore, pyjeve, zonave të mbrojtura etj. Në vitin 1981 u publikua për herë të parë Treguesi i Farave (Index Seminum), i cili shkëmbehet me rreth 160 Kopshte Botanike në mbarë botën. 

Në këtë mënyrë shkëmbehen vazhdimisht fara dhe informacion shkencor për florën dhe bimësinë e Shqipërisë.

KB është anëtar i Internacionales së Ruajtjes së Kopshteve Botanike (BGCI, Botanical Garden Conservation International), dhe ka qenë mjaft aktiv në disa projekte, si: Interreg II, Corine, Emerald, Peen-See, etc. Në KB kryejnë aktivitetin e tyre të plotë tre studiues, të kualifikuar në gjenetikë, sistematikë bimësh, fito-sociologji dhe ekologji bimore. Ata janë titullarë në lëndët universitare Gjeobotanikë, Fitogjeografi dhe Biogjeografi, si dhe në disa lëndë pasuniversitare në drejtimet biologjike. Ata aktivizohen rregullisht në drejtimin e praktikave në terren të disa lëndëve botanike si: Gjeobotanikë, Fitogjeografi, Biogjeografi, Sistematikë Bimësh dhe Botanikë e Përgjithshme, udhëheqin diploma universitare dhe pasuniversitare, si dhe ndihmojnë gjatë praktikave të fakulteteve ose dhe universiteteve të tjera.  KB luan rolin e një laboratori për nxënësit e shkollave dhe studentët, si dhe për shumë dashamirës të florës shqiptare. Ai vizitohet çdo vit nga shumë vizitorë të të gjitha moshave, kryesisht nxënës të shkollave 9-vjecare dhe të mesme të Tiranës ose të rretheve. KB është mjedis mësimor për studentët e drejtimeve biologjike të FSHN-së (UT), për studentët e Gjeografisë (UT), të Pylltarisë (Universiteti Bujqësor i Tiranës), si dhe për studentët e Biologjisë së universiteteve të Shkodrës, Elbasanit dhe Gjirokastrës.